Din hija sitwazzjoni li qegħda tinħoloq minħabba ż-żidiet kbar li qegħdin jaqgħu fuq is-swieqi nternazzjonali għal-prodotti essenzjali bħal qmugħ, ċerejali, laħam, ħalib u prodotti oħra. Iż-żidiet fil-prezzijiet ta` dawn il-prodotti primarji qed tikkawża żidiet fil-prezzijiet ta` prodotti bħal ħobż, laħam, ħalib, butir, ġobon, għaġin u l-prodotti l-oħra kollha li jiddependu fuq l-agrikoltura. Il-kawżiet ewlenin huma t-taħwid fil-klima, il-mard, kif wkoll l-enfasi kbira li qegħda ssir biex ħafna art fiż-żoni ewlenin ta` produzzjoni fid-dinja qed ikunu allokati għall-produzzjoni ta` biofuels bil-konsegwenza li l-produzzjoni ta` prodotti primarji għall-ikel qegħda tonqos u l-prezzijiet qegħdin jiżdiedu b’mod konsistenti. Din hi sitwazzjoni li l-esperti qegħdin isostnu li ser tibqa’ għall-żmien twil hekk kif id-domanda ta` l-ikel tkompli tiżdiet b’ritmu mgħaġġel.       

F’Malta u f’diversi pajjiżi oħra kemm fl-Unjoni Ewropeja kif ukoll barra qiegħed iqum paniku fost il-konsumaturi meta qed jaraw li l-prezz tal-ħalib nej jgħola bil 15% f’perjodu ta` tlett xhur u prodotti bħall-ħalib skimmed tat-trab jgħola b’20% min April l’hawn. Fl-UE l-ħażna tal-butir naqset b’50% fuq dik tas-sena ta` qabel u fl-Italja l-prezz ta` l-għagin tela` b’20%. Żidiet fil-prezzijiet qegħdin jinħassu b’mod regolari u konsistenti, u l-prezz tal-ħobż għola kullimkien mill-għanqas erbgħa ċenteżmi kull ħobża.

F’diversi pajjiżi fl-Ewropa u fosthom f’Malta diġa bdew jinstemaw ilħna ta’paniku u xi wħud li suppost jafu aħjar qegħdin jippretendu li l-gvernijiet jimponu sistemi ta` kontroll tal-prezzijiet jew skemi kbar ta` sussidji. Kif spjegat il-Kummissarju Kuneva l-bieraħ filgħodu waqt il-business breakfast, l-UE ma għandha l-ebda ħsieb li tbiddel l-istruttura tagħha, li hi bbażata fuq il-kompetizzjoni ġusta u ekonomija ħielsa, w lanqas ma hi se tidhol għal sistemi ta` sussidji ta` ikel mill-gvern bi ksur tar-regolamenti ewropej li jikkontrollaw is-sussidji mill-istat (state aid).

Il-GRTU qegħda tappella` pubblikament lill-gvern biex jirrezisti lil dawk li bl-għaġla u għall-skopijiet tagħhom qegħdin jinstigaw lill-gvern biex idawwar l-arloġġ lura xi għoxrin sena u jsallab lill-ħwienet u lin-negozji b’ħafna nkwiżizzjoni żejda ta` kontrolli ta` prezzijiet li ma jwasslu mkien u minflok jistudja flimkien mar-rappreżentanti tal-kummerċ kif jintnaqqas l-ixkiel żejjed u il-ħlasijiet u l-ispejjeż żejda li jġegħlu li l-prezzijiet li huma diġa mposti għoljin min barra ma jkollomx għalfejn jitgħabbew b’ħafna spejjeż żejda. Ħafna min dawn l-ispejjeż żejda huma mposti mil-gvern jew awtoritajiet pubbliċi jew monopolji ta` l-istat.

Il-GRTU flimkien mall-membri tagħha qegħda twiegħed il-kooperazzjoni totali tagħha biex bla paniku u bla inbix żejjed lill-kummerċjanti tinstab sistema sabiex id-daqqa li ġejja min barra nilqgħu għalija b’mod intelliġenti biex ma nerġgħux naqgħu għal sistemi li fil-passat ma taw l-ebda riżultat posittiv.